ក្មេងតូចរូបនេះឆ្លើយសំនួរកិច្ចការផ្ទះដែលគ្រូដាក់ឲ្យ ធ្វើឲ្យឪពុកក្មេងតូចនោះភ្ញាក់ខ្លួនព្រឺត ហើយខ្លោចចិត្តស្ទើរស្រក់ទឹកភ្នែក ពេលបានដឹង

បរទេស ៖ ក្មេងជាវ័យស្មោះត្រង់ដែលចូលចិត្តបង្ហាញអ្វីដែលពួកគេដឹង និងគិតដល់ទៅតាមរយៈពាក្យសម្តី កាយវិការ និងទង្វើរផ្សេងៗរបស់ពួកគេ។ ប្រភពព័ត៌មានបរទេសមួយបានចុះផ្សាយរឿងរ៉ាវរំជួលចិត្តមួយ ដែលក្មេងប្រុសម្នាក់បានប្រើប្រាស់ចម្លើយគណិតវិទ្យាបង្ហាញពីស្ថានភាពគ្រួសារគេសព្វថ្ងៃធ្វើអោយមនុស្សជាច្រើនសឹងស្រក់ទឹកភ្នែក។ ក្មេងប្រុសតូចនេះត្រូវបានគេដឹងថារៀននៅថ្នាក់ទី១ នៅសាលាបឋម​សិក្សាមួយកន្លែងក្នុងទីក្រុង Dawo ខេត្ត Sichuan ប្រទេសចិន។ កិច្ចការផ្ទះដែលគ្រូរបស់គេដាក់អោយគឺសំនួរដែលសួរថា “តើគ្រួសាររបស់អ្នកមានសមាជិកប៉ុន្មាននាក់?”។

ក្នុងក្រដាសចម្លើយដែលក្មេងប្រុសនោះសរសេរទៅអោយគ្រូវិញគេបានដាក់ថាក្នុងគ្រួសារគេមានសមាជិក៣នាក់ ទាំងដែលក្នុងគ្រួសាររបស់ការពិតមានសមាជិក៤នាក់។ ម្តាយគេមានការងឿងឆ្ងល់ខ្លាំងណាស់នៅពេលដែលបានឃើញចម្លើយរបស់កូនបែបនេះ គាត់បានសួរពីមូលហេតុដែលនាំអោយគេឆ្លើយបែបនេះ។ ក្មេង​ប្រុសតូចនោះបានប្រាប់ទៅម្តាយគេថា តែ៣ប៉ុណ្ណោះ ព្រោះប៉ាមិនដែលនៅផ្ទះនោះទេទោះបីជាថ្ងៃឈប់សម្រាក រឺ ថ្ងៃបុណ្យផ្សេងៗនោះទេ។ បន្ទាប់ពីទទួលចម្លើយបែបនេះពីកូនស្រ្តីជាម្តាយក៏បានថតរូបចម្លើយកិច្ចការផ្ទះរបស់កូនផ្ញើទៅអោយស្វាមីគាត់ដែលជាមន្ត្រីប៉ូលិស។

បុរសជាឪពុកនោះបានយកវាមកបង្ហោះចែករំលែកក្នុងបណ្តាញសង្គម គាត់បានសរសេរបន្ថែមថា “ដូច្នេះ ក្នុងគំនិតគាត់(កូន)ទៅលើគ្រួសារ មិនបានរាប់បញ្ចូលខ្ញុំចូលនោះទេ, ខ្ញុំពិតជាខូចចិត្តខ្លាំងណាស់”។ មានមនុស្សក្នុងបណ្តាញសង្គមជាច្រើនចាប់អារម្មណ៍ទៅលើរឿងនេះ មានអ្នកចែករំលែកមតិយោបល់ជាច្រើនទៀតផងទៅលើរឿងនេះ។ ស្រ្តីជាម្តាយក្មេងនេះបានប្រាប់ថា ” ទោះបីជាគាត់(ស្វាមី)មិនដែលផ្តល់ពេលវេលារ៉ូមែនទិក រឺ ភាពជាដៃគូអោយខ្លួនក៏ដោយ ខ្ញុំនៅតែមានមោទនៈភាពចំពោះគាត់”។ ក្មេងប្រុសអាចនឹងមិនដឹងក្នុងពេលឥឡូវនេះ តែពេលដែលគេធំឡើងគេនឹងដឹងថា លោកប៉ារបស់គេពលិកម្មប៉ុនណាទៅលើប្រទេសជាតិ និងគ្រួសារ៕

ប្រភព ៖ thecoverage