ហេតុអ្វីបានជាថ្ងៃ-ខែពិធីបុណ្យចូលឆ្នាំចិ​នតែងតែប្រែប្រួល?

ពិធីបុណ្យចូលឆ្នាំចិន ជាពិធីបុណ្យដ៏ពេញនិយមមួយ ដែលមិនមែនត្រឹមតែប្រទេសចិនទេ គឺមានបណ្តាប្រទេសជាច្រើនក្នុងតំបន់អាស៊ី បានប្រារព្ធពិធីនេះឡើងដើម្បីអបអរសាទរឆ្នាំថ្មី។ ជាមួយគ្នានេះ ក៏មានមនុស្សជាច្រើនបានងឿងឆ្ងល់ថា ហេតុអ្វីកាលបរិច្ឆេទចូលឆ្នាំចិនមិនមានកាលកំណត់ច្បាស់លាស់? ជាក់ស្ដែង ពិធីចូលឆ្នាំចិន ជាទូទៅតែងប្រារព្ធចាប់ពីកំឡុងថ្ងៃទី ២០ ខែមករា ដល់ ថ្ងៃទី ២១ កុម្ភៈ។ ហើយមូលហេតុដែលពិធីបុណ្យមួយនេះមិនមានកាលកំណត់ត្រឹមត្រូវគឺដោយសារតែប្រតិទិនច័ន្ទគតិរបស់ចិន គឺគិតតាមវដ្តដំណើរថ្មីរបស់ព្រះច័ន្ទ។ មួយវិញទៀត ក្រៅពីយោងតាមព្រះច័ន្ទ កាលបរិច្ឆេទថ្ងៃចូលឆ្នាំចិនក៏អាស្រ័យទៅលើដំណើរព្រះអាទិត្យផងដែរ។

ពិធីចូលឆ្នាំចិន ជាទូទៅគឺកំណត់រយៈពេល ១ រឺ ២ ខែ បន្ទាប់ពីថ្ងៃដែលមានរយៈពេលខ្លីជាងគេបំផុតប្រចាំឆ្នាំ ដោយភាគច្រើនថ្ងៃមួយនេះគឺមានក្នុងខែធ្នូ ដែលជាខែមានអាកាសធាតុត្រជាក់ ហើយដំណើរព្រះអាទិត្យឆាប់លិចបំផុត។ បើគិតរយៈពេល ១ រឺ ២ ខែបន្ទាប់ពីខែធ្នូ គឺចំនឹងខែមករា រឺកុម្ភៈនេះឯង។ ម្យ៉ាងទៀត បើតាមប្រវត្តិសាស្ត្ររបស់ចិន ពិធីបុណ្យចូលឆ្នាំនេះធ្វើឡើងក្នុងកំឡុងខែមករា កុម្ភៈ ដែលជារដូវផ្ការីក ក្នុងបំណងបួងសួងបារមីទាំងឡាយ ឲ្យការប្រមូលដំណាំទទួលបានផលល្អ មុននឹងរដូវច្រូតកាត់ឈានចូលមកដល់។ ជាក់ស្ដែង នេះក៏ជាមូលហេតុមួយដែលប្រជាជនចិននាំគ្នាហៅពិធីបុណ្យចូលឆ្នាំចិនថាជា «ពិធីបុណ្យនិទាឃរដូវ»៕

​ប្រភព៖ chinahighlight