លក់ទឹកត្នោតជូមួយថ្ងៃតែ២-៣ម៉ោង តែអាចរកចំណូលបានមិនក្រោម១០ម៉ឺនរៀលឡើយ

ស្ថិតក្នុងសំលៀកបំពាក់អាវឆ្នូតដៃវែង បងស្រី មុយ ស្រីស្រស់ ជាអ្នកលក់ទឹកត្នោតជូនៅចំហៀងបុរីជីបម៉ុង ខណ្ឌសែនសុខ បានប្រាប់ក្រុមការងារខ្មែរណូតឲ្យដឹងថា បងស្រី និងស្វាមីចាប់ផ្តើមអាជីវកម្មលក់ទឹកត្នោតជូនេះយូរឆ្នាំមកហើយ ដោយជារៀងរាល់ថ្ងៃពួកគាត់ទាំង២នាក់ចាប់ផ្តើមលក់ពីម៉ោង៣ឬ៤រសៀលរហូតដល់ម៉ោង៦ល្ងាច។

បងស្រីបានឲ្យដឹងទៀតថា ទឹកត្នោតជូទាំងនេះគឺប្តីរបស់គាត់ជាអ្នកឡើងគៀបយកទឹកដោយផ្ទាល់តែម្តងនៅម្តុំវត្តឈូកវ៉ា ហើយបងស្រីហ៊ានធានាថា ទឹកត្នោតជូរបស់គាត់សុទ្ធ១០០% មិនមានលាយទឹកអង្ករ ឬលាយអ្វីផ្សេងឡើយ។ សម្រាប់ទឹកត្នោតជូមួយលីត្រមានតម្លៃត្រឹមតែ២,០០០រៀលប៉ុណ្ណោះ ហើយក្នុងមួយថ្ងៃបងស្រីម្នាក់ឯងអាចរកចំណូលបានពី៥០,០០០រៀលទៅ៦០,០០០រៀល រីឯស្វាមីរបស់គាត់ដើរលក់នៅកន្លែងផ្សេងគ្នា និងអាចលក់ចំណូលបានប្រហាក់ប្រហែលនឹងគាត់ដែរ៕

អត្ថបទ៖ សេម