រថយន្តហុីណូបុកបុរសម្នាក់បែកក្បាលខ្ទេច ស្លាប់ភ្លាមៗនៅកន្លែងកើតហេតុ

កំពត៖ ករណីគ្រោះថ្នាក់ចរាចរណ៍រថយន្តបុកជាមួយម៉ូតូបណ្តាលអោយអ្នកបើកបរម៉ូតូស្លាប់ភ្លាមៗនៅកន្លែងកើតហេតុយ៉ាងអនោចអធ័ម ដែលហេតុការណ៍នេះបង្ករអោយមានការភ្ញាក់ផ្អើលកាលពីវេលាម៉ោង៦និង២៥នាទីល្ងាច ថ្ងៃទី១៦ ខែកក្កដា ឆ្នាំ២០១៧ នៅតាមបណ្តោយផ្លូវជាតិលេខ៣១ ស្ថិតក្នុងភូមិទន្លេនាម ឃុំចំបុី ស្រុកអង្គរជ័យ ខេត្តកំពត។

ប្រភពពត៌មានបានអោយដឹងថា មុនកើតហេតុគេឃើញរថយន្តបង្ករម៉ាកហុីណូ ពណ៌ស្លឹកឈើចាស់ ពាក់ស្លាកលេខ ភ្នំពេញ 3A-1973 ធ្វើដំណើរក្នុងល្បឿនលឿន ទិសដៅពីជើងទៅត្បូងតាមបណ្តោយផ្លូវជាតិលេខ៣១ លុះមកដល់ចំណុចកើតហេតុបានជ្រុលទៅបុកពីមុខម៉ូតូជនរងគ្រោះដែលកំពុងបើកបរក្នុងទិសដៅបញ្ច្រាសគ្នាពេញទំហឹងបណ្តាលអោយជនរងគ្រោះដួលបោកក្បាលខ្ទេចស្លាប់ភ្លាមៗនៅកន្លែងកើតហេតុ។ ជនរងគ្រោះដែលស្លាប់បាត់បង់ជីវិតមានឈ្មោះ ហ៊ត សាវឿន ភេទប្រុស អាយុ៣៥ឆ្នាំ មានទីលំនៅភូមិគោកព្រិច ស្រុកត្រាំកក់ ខេត្តតាកែវ ចំណែកអ្នកបើកបររថយន្តបង្ករមានឈ្មោះ ហុិន វណ្ណះ ភេទប្រុស អាយុ២២ឆ្នាំ មានទីលំនៅភូមិអណ្តូងខ្មែរ ឃុំអំពិល ស្រុកកំពង់សៀម ខេត្តកំពង់ចាម ត្រូវសមត្ថកិច្ចឃាត់ខ្លួន។

សាកសពត្រូវបានសមត្ថកិច្ចទាក់ទងទៅក្រុមគ្រួសារអោយមកទទួលយកទៅធ្វើបុណ្យតាមប្រពៃណី ចំណែករថយន្តនិងម៉ូតូសមត្ថកិច្ចយកទៅរក្សាទុកនៅអធិការដ្ឋាននគរបាលស្រុកអង្គរជ័យដើម្បីរង់ចាំការដោះស្រាយជាបន្ត៕

 

COMMENTS