ក្រុមហ៊ុន YAMAHA បន្តផ្តល់សិទ្ធិចែកចាយដល់ដៃគូររបស់ខ្លួនក្នុងការ លក់បន្តនូវម៉ូតូស៊េរីថ្មី

កាលពីថ្ងៃទី១២ ខែកក្កដា ឆ្នាំ២០១៧ កន្លងទៅនេះក្រុមហ៊ុន Yamaha ដែលជាក្រុមហ៊ុនផលិតម៉ូតូដ៏ល្បីមួយរបស់ប្រទេសជប៉ុន ដែលត្រូវបាននាំចូលផ្តាច់មុខក្នុងប្រទេសកម្ពុជាតាមរយះលោកឧកញ៉ា គង់ នួន បានធ្វើការផ្តល់សិទ្ធិចែកចាយបន្តក្នុងការលក់ម៉ូតូស៊េរីថ្មីទំនើបរបស់ខ្លួនជូនដៃគូរសហការណ៍ថ្មីមួយទៀតដែលស្ថិតនៅតាមបណ្តោយផ្លូវ មហាវិថីព្រះសីហនុ ដែលជាកន្លែងទីប្រជុំជនតែម្តង។

លោកឧកញ៉ា គង់​ នួន បានមានប្រសាសន៍ថា “ថ្ងៃនេះក្នុងនាមខ្ញុំជាអគ្គនាយកក្រុមហ៊ុន គង់ នួន គ្រុប ដែលទទួលបានសិទ្ធិផ្តាច់មុខនាំចូល និងចែកចាយម៉ូតូយ៉ាម៉ាហានៅក្នុងប្រទេសកម្ពុជា ពីយ៉ាម៉ាហាប្រទេសជប៉ុន ខ្ញុំមានសេចក្តីសប្បាយរីករាយ ក្រៃលែងដែលបានចាប់ដៃគូជាមួយលោក វ៉ា សៀង ដែលមានបទពិសោធន៍ក្នុងវិស័យនេះរយះពេលជាង ៣០ឆ្នាំកន្លងមកហើយ។ តាមរយៈបទពិសោធន៍របស់ខ្ញុំ និងយុទ្ធសាស្រ្តថ្មីរបស់យ៉ាម៉ាហា ក្រោមការគ្រប់គ្រងរបស់ខ្ញុំផ្ទាល់ ខ្ញុំមានជំនឿចិត្តយ៉ាងមុតមាំថា គ្រប់ដៃគូអាជីវកម្មទាំងអស់ និងតំណាងចែកចាយរបស់យ៉ាម៉ាហាគ្រប់ប្រភេទ នឹងទទួលបាននូវអត្ថប្រយោជន៍ និងភាគលាភគួរជាទីគាប់ចិត្ត ហើយថ្ងៃនេះគឺជាចំនុចចាប់ផ្តើមមួយដ៏ល្អបំផុត ដែលបង្ហាញអំពីភាពជាដៃគូយូរអង្វែងរវាងយ៉ាម៉ាហា និងតំណាងចែកចាយរបស់យើង គឺលោក វ៉ា សៀង”។

លោក វ៉ា សៀង អ្នកទទួលសិទ្ធិចែកចាយបន្តលក់ម៉ូតូ Yamaha មានប្រសាសន៍ថា” ដោយមើលឃើញពីសក្តានុពល និងមើលឃើញអំពីយុទ្ធសាស្រ្តថ្មីរបស់យ៉ាម៉ាហា ក្រោមការគ្រប់គ្រងដោយផ្ទាល់របស់លោក ឧកញ៉ា គង់ នួន ដែលជាពាណិជ្ជករប្រកបដោយបទពិសោធន៍ខ្ពស់ និងមានភាពជោគជ័យខ្លាំង ដូច្នេះហើយទើបរូបលោកសំរេចចិត្តចាប់ដៃគូជាមួយយ៉ាម៉ាហា។ ម្យ៉ាងវិញទៀតម៉ូដែលយ៉ាម៉ាហាមានឈ្មោះបោះសម្លេងជាយូរមកដែរហើយ។ ម៉ូតូម៉ូដែលយ៉ាម៉ាហាផលិតឡើងតាមស្តង់ដាបច្ចេកវិទ្យាប្រទេសជប៉ុនសុទ្ធសាទ។ អស់លោក លោកស្រីជ្រាបហើយថា ជប៉ុនគឺគិតគូរខ្លាំងណាស់ទៅលើផ្នែកសុវត្ថិភាព និងការសន្សំសំចៃចំពោះអ្នកប្រើប្រាស់។ បច្ចុប្បន្នយើងមានបច្ចេកវិទ្យាថ្មីមួយហៅថា Blue Core ដែលជួយសន្សំសំចៃសាំង ជួយកាត់បន្ថយកម្តៅម៉ាស៊ីន ជួយកាត់បន្ថយសម្លេងរំខាន និងបង្កើនថាមពលម៉ាស៊ីន ដែលជាកត្តាសំខាន់ជួយសន្សំដល់អ្នកប្រើប្រាស់ជាចម្បង”។

គួរបញ្ជាក់ផងដែរថា ក្រុមហ៊ុន Yamaha គឺជាក្រុមហ៊ុនផលិតម៉ូតូដ៏ល្បីមួួយក្នុងប្រទេសជប៉ុុនដែលវាចាប់កំណើតក្នុងប្រទេសជប៉ុនតាំងពីឆ្នាំ១៩៥៥ មកម៉្លេះ ដែលត្រូវបានគេទទួលស្គាល់ទូទាំងពិភពលោកជាយូរឆ្នាំមកហើយផងដែរ៕

COMMENTS