អស្ចារ្យពេកហើយ! ពាក់មួកសុវត្ថិភាពនេះពេលបើកបរ អ្នកនឹងអាចមើលឃើញបាន 360ដឺក្រេ គ្មានសម្លេងរំខាន និងអ្វីៗជាច្រើនទៀត (មានវីដេអូ)

មួកសុវត្ថិភាព នៅតែជារបស់សំខាន់បំផុតសម្រាប់អ្នកដែលធ្វើដំណើរតាមម៉ូតូ ព្រោះវាអាចការពារអ្នកជិះពីគ្រោះថ្នាក់ចរាចរណ៍ដល់ជីវិត និងការពារមិនឲ្យប៉ូលីសផាកពិន័យផងដែរ។ ដោយឡែក សម្រាប់មួកសុវត្ថិភាពដែលយើងទាំងអស់គ្នាប្រើប្រាស់រាល់ថ្ងៃនេះ គឺសាមញ្ញធម្មតាបំផុត ពោលគឺមានតែជ័ររឹងមាំការពារក្បាល និងកញ្ចក់ពីមុខដើម្បីមើលផ្លូវប៉ុណ្ណោះ។ ប៉ុន្ដែសម្រាប់មួកសុវត្ថិភាពនេះវិញ គឺមិនដូចគ្នាឡើយ រឺអាចនិយាយបានថា នេះគឺជាមួកសុវត្ថិភាពនាថ្ងៃអនាគត។

ផលិតផលដ៏អស្ចារ្យសម្រាប់ការពារក្បាលអ្នកជិះម៉ូតូពេលមានគ្រោះថ្នាក់នេះ មានឈ្មោះថា CrossHelmet ហើយវាមានភ្ជាប់មកជាមួយនឹងអ្វីៗស្ទើរគ្រប់យ៉ាងដែលអ្នកជិះម៉ូតូចង់បាន។ អ្វីដែលអស្ចារ្យបំផុតនោះគឺ នៅពេលដែលអ្នកពាក់មួកសុវត្ថិភាពនេះ អ្នកនឹងអាចមើលបានជុំវិញខ្លួន 360ដឺក្រេឯណោះ ព្រោះនាផ្នែកខាងក្រោយរបស់មួកនេះ មានភ្ជាប់មកជាមួយនឹងកាមេរ៉ាមួយដើម្បីថតរាល់សកម្មភាពទាំងអស់ពេលកំពុងធ្វើដំណើរ និងបង្ហាញមកកញ្ចក់ខាងមុខ។ លើសពីនេះទៅទៀត CrossHelmet ក៏មានភ្ជាប់មកជាមួយនឹងមុខងារកាត់បន្ថយសម្លេងរំខានផងដែរ។

នៅមិនទាន់អស់ទេសម្រាប់លក្ខណៈពិសេសដែលមួកសុវត្ថិភាពនេះមាន។ CrossHelmet ក៏អនុញ្ញាតឲ្យអ្នកអាចឆាត ផ្ញើររូបភាព រឺវីដេអូទៅកាន់មិត្តភក្ដិដទៃទៀតបានផងដែរ។ មិនតែប៉ុណ្ណោះ មួកនេះក៏អាចឲ្យអ្នកចែករំលែកទិន្នន័យទីតាំង និងនាំផ្លូវអ្នកទៅកាន់អ្នកជិះដទៃទៀតបានយ៉ាងងាយស្រួលទៀតផង។

គួរបញ្ជាក់ផងដែរថា CrossHelmet នឹងត្រូវបានចាប់ផ្ដើមចេញលក់នាកំឡុងខែតុលា ឆ្នាំ2018 ខាងមុខនេះ ជាមួយនឹងតម្លៃ $1,399។

Fu

ប្រភព៖ thenextweb