១០ ចំនុចងាយៗ ជួយឲ្យនារីទទួលបានសិទ្ធិ និងលើកតម្កើងតម្លៃរបស់ខ្លួនកាន់តែខ្ពស់

ជាយូរណាស់មកហើយ នារីភេទត្រូវបានចាត់ទុកថាជាភេទដែលពិភពលោកទាំងមូលគោរព និងឲ្យតម្លៃជាពិសេស ជាក់ស្ដែងតាមរយៈការបង្កើតសិទ្ធនារីអន្តរជាតិ ដែលប្រារព្ធឡើងជារៀងរាល់ឆ្នាំនៅថ្ងៃទី ០៨ មីនា។ យ៉ាងណាមិញ ក្រៅពីសិទ្ធទាំងឡាយដែលទទួលបានពីការឲ្យតម្លៃដោយមនុស្សលើពិភពលោកហើយ ស្រីៗទាំងអស់គួរតែមានចំនុចខ្លះៗ ក្នុងការតម្កើងតម្លៃខ្លួនឲ្យកាន់តែខ្ពស់។ ១០ ចំនុចខាងក្រោមនេះ អាចជួយជាគំនិតខ្លះៗ សម្រាប់នារីក្នុងការលើកកម្ពស់ដល់ខ្លួនឯង ក៏ដូចជាធ្វើឲ្យបុរសកាន់តែគោរពចំពោះខ្លួនផងដែរ៖

១. ជឿជាក់លើខ្លួនឯង៖ ជាការពិតណាស់ មិនថាមានរឿងអ្វីកើតឡើងក៏ដោយ ការជឿជាក់លើខ្លួនឯងជាអ្វីដែលយើងចាំបាច់មិនអាចខ្វះបាន។ មនុស្សស្រីដែលពោរពេញដោយជំនឿជឿជាក់ និងទំនុកចិត្តលើខ្លួនឯងខ្ពស់ តែងតែធ្វើឲ្យគ្រប់គ្នាមានការគោរព និងឲ្យតម្លៃខ្ពស់ជាពិសេស។
២. មានទំនួលខុសត្រូវ៖ ទំនួលខុសត្រូវជាទូទៅតែងភ្ជាប់មកជាមួយនឹងទំនុកចិត្តលើខ្លួនឯង។ មិនថាធ្វើអ្វីក៏ដោយ ទំនួលខុសត្រូវខ្ពស់រាល់ការងារ និងក្ដីសម្រេចចិត្ត បង្ហាញយ៉ាងច្បាស់ពីតម្លៃរបស់មនុស្សស្រីម្នាក់ៗ។
៣. លេងសើច តែប្រាកដប្រជា៖ ការនិយាយលេងសើចជារឿងមួយដែលនារីចៀសមិនផុតក្នុងការបង្កើនភាពគួរឲ្យស្រលាញ់ និងទំនាក់ទំនងឲ្យកាន់តែប្រសើរ។ ប៉ុន្តែកុំភ្លេចណា៎! ក្នុងលក្ខខ័ណ្ឌខ្លះ ការលេងសើចនោះក៏គួរតែមានភាពប្រាកដប្រជាក្នុងនោះ ដើម្បីរក្សាតម្លៃរបស់ខ្លួនកាន់តែខ្ពស់។
៤. មានទំនាក់ទំនងល្អ៖ ការប្រាស្រ័យទាក់ទងទៅជុំវិញខ្លួនជាចំនុចមួយដ៏សំខាន់ក្នុងជីវភាពរស់នៅប្រចាំថ្ងៃ។ ម៉្យាងទៀត នារីៗ គ្រប់រូបក៏អាចលើកកម្ពស់តម្លៃខ្លួនតាមរយៈការរក្សាទំនាក់ទំនងជាមួយនឹងមនុស្សជុំវិញខ្លួនឲ្យកាន់តែប្រសើរឡើងផងដែរ។
៥. ភាពស្មោះត្រង់ ៖ មិនមែនត្រឹមតែស្រីៗ ទេ តែភាពស្មោះត្រង់គឺបង្ហាញយ៉ាងច្បាស់ពីតម្លៃរបស់មនុស្សម្នាក់ៗ។
៦. មានចំនេះដឹង៖ មិនសង្កត់ធ្ងន់ទៅលើការសិក្សានោះទេ។ ការចេះជំនាញណាមួយ និងមានចំនេះដឹងទូទៅខ្ពស់ ជាចំនុចមួយដែលធ្វើឲ្យនារីលេចធ្លោជាពិសេស។
៧. ចេះរៀបចំខ្លួន៖ ទោះជាមានមុខមាត់យ៉ាងណាក៏ដោយ សំខាន់លើការរៀបចំខ្លួនឲ្យមើលទៅសមរម្យ ស្អាតបាត និងភាពរៀបរយតាមកាលៈទេសៈ ជារឿងមួយដែលនារីៗ គួរយកចិត្តទុកដាក់ជាប្រចាំ។
៨. អត្តចរិក៖ ជាទូទៅបុរសមិនសូវចូលចិត្តស្រីណាដែលមានភាពឆេវឆាវនោះទេ។ មួយវិញទៀតភាពឆេវឆាវ តែងតែធ្វើឲ្យយើងធ្វើអ្វីមួយមិនសូវបានសម្រេចនោះទេ។ ហេតុនេះស្រីគួរតែរក្សាអត្តចរិករបស់ខ្លួនឲ្យមានភាពត្រជាក់ និងស្ងប់ជានិច្ច ដើម្បីទទួលបានការគោរពកោតខ្លាចពីអ្នកជុំវិញខ្លួន។

៩. គោរពប្រពៃណី៖ មិនថាសម័យណាក៏ដោយ ប្រពៃណីក៏នៅតែជាប្រការសំខាន់ក្នុងការឲ្យតម្លៃទៅលើនារីខ្មែរផងដែរ។
១០. ស្នាមញញឹម៖ ជាការពិតណាស់! ការញញឹមជាទម្លាប់ដ៏ល្អមួយដែលមនុស្សគ្រប់រូបគួរធ្វើ។ ស្នាមញញឹម អាចបង្ហាញយ៉ាងច្បាស់ពីភាពស្រស់ស្អាត ការជឿជាក់ ទំនុកចិត្ត ដែលចេញពីខ្លួនយើងម្នាក់ៗ៕