រថយន្តបែនដឹកដីមិនទម្លាក់បែន បើកទាក់ខ្សែភ្លើងរប៉ាត់រប៉ាយពេញផ្លូវ

រាជធានីភ្នំពេញ៖ កាលពីវេលាម៉ោង០៦ និង៤០នាទីយប់ថ្ងៃទី០៤ ខែមីនា ឆ្នាំ២០១៨ មានករណីរថយន្តបែនដឹកដីមួយគ្រឿងបើកបរទាំងមិនទម្លាក់បែន ធ្វើឲ្យទាក់ខ្សែភ្លើងធ្លាក់រាយប៉ាយពេញផ្លូវ និងដាច់ភ្លើងអស់ជាច្រើនម៉ោង។ ហេតុការណ៍នេះបានកើតឡើងនៅតាមបណ្តោយផ្លូវ២៧១ ភូមិតាឡី សង្កាត់ដង្កោ ខណ្ឌដង្កោ រាជធានីភ្នំពេញ។

ប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុគេឃើញរថយន្តដឹកដីមួយគ្រឿង ពាក់ស្លាកលេខ ភ្នំពេញ 3A-630៧ ធ្វើដំណើរពីជើងទៅត្បូង ដោយមិនទម្លាក់បែនខាងក្រោយរថយន្តឡើយ លុះមកដល់ចំណុចកើតហេតុក៏បានទាក់ជាមួយនឹងខ្សែភ្លើង បណ្តាលឲ្យធ្លាក់រប៉ាត់រប៉ាយពេញផ្លូវ និងបាក់បង្គោលភ្លើងមួយដើមតែម្តង។ ក្រោយកើតហេតុតៃកុងរថយន្តបានរត់គេចខ្លួនបាត់ស្រមោល បន្សល់ទុករថយន្តចោលនៅកន្លែងកើតហេតុ៕