ជូនជាពិសេសសម្រាប់អ្នកចាប់ផ្ដើមរៀនថតរូប! នេះគឺជា Canon Rebel T100 កាមេរ៉ា DSLR ចេញថ្មីដែលមានតម្លៃធូថ្លៃបំផុត…

ក្នុងសប្ដាហ៍នេះ ក្រុមហ៊ុន Canon ទើបតែបានប្រកាសទាក់ទងទៅនឹងកាមេរ៉ាថ្មីរបស់ខ្លួនម៉ូដែល Rebel T7 ហើយសម្រាប់ពេលនេះក្រុមហ៊ុនបានធ្វើការប្រកាសថែមមួយម៉ូដែលទៀត នោះគឺ EOS 4000D DSLR ជាប្រភេទកាមេរ៉ា DSLR ដែលមានតម្លៃធូថ្លៃបំផុត។

ទាក់ទងទៅនឹងសមត្ថភាពរបស់ Canon 4000D គឺមិនសូវជាអស្ចារ្យប៉ុន្មានទេទាំងមុខងារ និងគុណភាព។ ដូចទៅនឹងអ្វីដែលអ្នកបានឃើញចឹង គឺជើងភ្ជាប់ lens នៅលើកាមេរ៉ាត្រូវបានផលិតឡើងពីដែកធម្មតាប៉ុណ្ណោះ។ ក្រៅពីនេះ តួខ្លួនរបស់កាមេរ៉ានេះទាំងមូលគឺមានពណ៌ខ្មៅ និងផ្នែកមួយចំនួនគឺជាប្លាស្ទិច។ ទោះជាយ៉ាងណា 4000D ក៏នៅតែផលិតរូបភាពបានល្អ ហើយអ្វីដែលពិសេសគឺតម្លៃធូថ្លៃបំផុត។

គួរបញ្ជាក់ផងដែរថា កាមេរ៉ា 4000D មានទំហំ 18-megapixel ប្រភេទ APS-C sensor តូចជាងម៉ូដែល Rebel T7/2000D បន្ដិចដែលមានទំហំ 24.1-megapixel។ លើសពីនេះទៅទៀត 4000D ក៏មានភ្ជាប់មកជាមួយនឹងប្រព័ន្ធដំណើរការ DIGIC 4+ ជាមួយនឹងកម្រឹត Aperture ខ្ពស់បំផុត 6400 (អាចបន្ថែមបានដល់ 12800)។ សម្រាប់ការថតរូប កាមេរ៉ានេះអាចធ្វើបានក្នុងល្បឿន 3fps ជាមួយនឹងចំណុច Focus មាន 9។

ចំពោះផ្ទៃខាងក្រោយរបស់ 4000D គឺមានអេក្រង់ទំហំ 2.68អ៊ីញមួយ ប្រភេទ LCD និងលើនោះបន្ដិចគឺជា Viewfinder មួយផងដែរ។ មិនតែប៉ុណ្ណោះ កាមេរ៉ានេះក៏មានភ្ជាប់មកជាមួយនឹងមុខងារ Wi-Fi អាចថតវីដេអូបានក្នុងកម្រឹត Full HD មុខងារបង្រៀនអ្នកទើបចាប់ផ្ដើមដំបូង និងថាមពលថ្មដែលអាចថតរូបបាន 500ប៉ុស្ដ៍ រឺ 1ម៉ោង 15នាទីសម្រាប់ការថតវីដេអូក្នុងកម្រឹត HD។

អ្វីដែលពិសេសបំផុតសម្រាប់ Canon EOS 4000D គឺតម្លៃរបស់វាត្រឹមតែ $385 ប៉ុណ្ណោះសម្រាប់តួម៉ាស៊ីន (គ្មាន lens)។ យោងតាមតម្លៃប៉ុណ្ណេះ អាចនិយាយបានថា នេះគឺជាម៉ូដែលដែលធូថ្លៃបំផុតហើយក្នុងចំណោមកាមេរ៉ា DSLR ទាំងអស់។

Fu

ប្រភព៖ petapixel