ជិតដល់ថ្ងៃសិទ្ធនារីហើយ ប្រុសៗ ត្រៀមហើយរឺនៅថាគួរទិញអ្វីជាអំណោយជូនពួកគាត់?

ទិវាបុណ្យសិទ្ធនារីអន្តរជាតិដែលតែងធ្វើឡើងនៅថ្ងៃទៅ ០៨ មីនា ជារៀងរាល់ឆ្នាំ ត្រូវបានគ្រប់គ្នាដឹងថា ធ្វើឡើងដើម្បីលើកកម្ពស់សិទ្ធិនារី ដែលជាភេទទន់ខ្សោយឲ្យទទួលបានអ្វីគ្រប់យ៉ាងស្មើរនឹងបុរស។ ជាមួយគ្នានេះ ស្ថិតក្នុងថ្ងៃដ៏ពិសេសនេះ ក៏ជាឱកាសដ៏ល្អមួយសម្រាប់បុរសៗ ក្នុងការជូនអំណោយទៅកាន់នារីដែលនៅជុំវិញខ្លួន ដើម្បីជាការផ្ដល់តម្លៃ និងបង្ហាញនូវក្ដីស្រលាញ់ទៅកាន់ពួកគាត់។ ហេតុនេះ ថ្ងៃនេះខ្មែរណូតបានលើកយកគំនិតខ្លះៗ​ មកទុកចែករំលែក។ ខាងក្រោមនេះជារបស់មួយចំនួន ដែលអ្នកអាចជ្រើសរើសមកធ្វើជាអំណោយក្នុងថ្ងៃទិវាសិទ្ធនារី៖

១. បាច់ផ្កា៖ ជាការពិតណាស់! ផ្កាជារបស់សំខាន់មួយ ដែលគេតែងជ្រើសរើសធ្វើជាអំណោយមិនដែលខាន ដោយសារតែក្លិនក្រអូប និងភាពស្រស់ស្អាតរបស់វាដែលដូចជាបានបង្ហាញនូវទឹកចិត្តរបស់យើងចំពោះអ្នកទទួលបានរួចស្រាប់។

២. គ្រឿងសម្អាង៖ ស្រីណាក៏ដូចគ្នាដែរ ភាគច្រើនគឺតែងតែស្រលាញ់ និងថែរទាំសម្រស់របស់ខ្លួនឲ្យបានស្រស់ស្អាតគង់វង្ស។ ហេតុនេះការជូនជា ផលិតផលរក្សាសម្ផស្ស ក្រែមលាបមាត់ ម៉ាស្ការា រឺអាចជាឈុតតុបតែងមុខតែម្ដង។

៣. សម្លៀកបំពាក់៖ ការជូនអំណោយជាសំលៀកបំពាក់ជារឿងមួយដ៏ពេញនិយមមួយ។ អ្នកអាចទិញជា ឈុតរ៉ូបសាមញ្ញៗ កន្សែងបង់ក ឬអាចជាអាវក្រៅក៏បាន។

៤. គ្រឿងអលង្ការ៖ មានដូចជាខ្សែក ខ្សែដៃ ចិញ្ចៀន និងក្រវិលជាដើម។

៥. គ្រឿងអេឡិចត្រូនិច៖ មានដូចជាទូរស័ព្ទ ថ្មជំនួយ រឺសំបកការពារទូរស័ព្ទ ក៏ជាអំណោយដ៏ទាន់សម័យមួយផងដែរ។

៦. របស់ប្រើប្រាស់ប្រចាំថ្ងៃ៖ របស់ប្រើប្រាស់តូចតាចក៏អាចក្លាយជាអំណោយដ៏ពិសេសមួយបានដែរ។ ក្នុងនោះបុរសៗ អាចជ្រើសយកជា សម្ភារៈការិយាល័យដូចជា ប៊ិច កូនសៀវភៅកត់ត្រា បន្តោងសោរ និងមួយវិញទៀតគឺគ្រឿងតុបតែងសក់ ដូចជាតង្កៀប រឺបូរចងសក់ ក៏មើលទៅប្លែកមួយបែបផងដែរ។

៧. កាបូប៖ នារីៗ ទៅណាគឺមិនអាចខ្វះកាបូបពីខ្លួនបានឡើយ ចឹងហើយអ្នកអាចទិញជាកាបូបដាក់លុយ រឺកាបូបយួរដៃ មកធ្វើជាអំណោយក៏បាន។

៨. វត្ថុអនុស្សាវរីយ៍៖ គ្រឿងសម្រាប់ដាក់តាំង ដូចជារូបថ្ម ប្រដាប់សង្កត់ក្រដាស រឺក្រឡសរសេរពាក្យជូនពរ ក៏ជាអំណោយគួរឲ្យចាប់អារម្មណ៍ដូចគ្នាដែរ។

៩. ញ៉ាំអាហារនៅខាងក្រៅ៖ ក្រៅពីជូនជាអំណោយហើយ លោកអ្នកអាចចំណាយពេលវេលាខ្លះញ៉ាំអាហារខាងក្រៅ ក៏ចាត់ទុកថាជាការផ្ដល់តម្លៃដល់នាងផងដែរ។

គួរបញ្ជាក់ផងដែរថា នៅថ្ងៃទី៣ ខែមិនា នេះក៏មានកម្មវិធីប្រគុំតន្ត្រីដ៏អស្ចារ្យផងដែរ ដើម្បីអបអរទិវាសិទ្ធិនារី លើកទី ១០៧ នៅមុខសាលមហោស្រពកោះពេជ្រ ដូចនេះកុំភ្លេចចូលរួមទស្សនាដោយសេរីទាំងអស់គ្នាណា៕