រលកយក្សស៊ូណាមិវាយប្រហារឥណ្ឌូនេស៊ីមួយថ្ងៃសោះ ចំនួនអ្នកស្លាប់ និងរបួសលោតឡើងដល់ជិត៤០០នាក់

ឥណ្ឌូនេស៊ី៖ កាលពីថ្ងៃសុក្រ ម្សិលមិញនេះ គ្រោះធម្មជាតិដ៏រន្ធត់មួយគឺរលកយក្សស៊ូណាមិ បានវាយប្រហារមកលើទីក្រុង Palu នៅលើកោះ Sulawesi ប្រទេសឥណ្ឌូនេស៊ី បង្កជាសោកនាដកម្មដ៏គួរឲ្យអាណិតអាសូរសម្លាប់មនុស្ស និងបំផ្លិចបំផ្លាញទ្រព្យសម្បត្តិជាច្រើន។ យោងតាមទីភ្នាក់ងារគ្រោះមហន្តរាយបាននិយាយកាលពីថ្ងៃសៅរ៍ ទី២៩ ខែកញ្ញា ថា ចំនួនអ្នកស្លាប់ដោយសារការរញ្ជួយដី និងរលកយក្សស៊ូណាមិបានកើនឡើងដល់ ៤៨នាក់ និងជាង៣០០នាក់ផ្សេងទៀតរងរបួសធ្ងន់ស្រាល ហើយនៅតាមមន្ទីរពេទ្យនានាគ្រូពេទ្យកំពុងតែប្រញាប់ប្រញាល់ជួយសង្គ្រោះមនុស្សជាច្រើន ដែលកំពុងរងរបួស។

យោងតាមប្រភពព័ត៌មានបរទេសបានឲ្យដឹងថា កោះ Sulawesi មានប្រជាពលរដ្ឋនៅប្រមាណចំនួន៣៥ម៉ឺននាក់។ រលកយក្សស៊ូណាមិនេះបានកើតឡើង ដោយសារតែគ្រោះរញ្ចួយដីកម្រិត ៧.៥រ៊ិចទ័រ បានកើតឡើងនៅចម្ងាយប្រមាណជា ៨០ គីឡូម៉ែត្រពីក្រុងកើតហេតុ។ អគារជាច្រើនត្រូវបានដួលរលំហូរទៅតាមទឹក ផ្ទះសម្បែងប្រជាពលរដ្ឋក៏ត្រូវកំលាំងវាយបំផ្លាញខ្ទេច អគ្គិសនី និងការទាក់ទងក៏ត្រូវកាត់ផ្តាច់ផងដែរ ហើយពេលនេះអាជ្ញាធរមិនទាន់ឲ្យប្រជាពលរដ្ឋចូលក្នុងផ្ទះនោះ នៅឲ្យឆ្ងាយពីអគារខ្ពស់ និងស្វែងរកទីទួលសុវត្ថិភាព ជៀសវាងហេតុការណ៍ណាមួយកើតឡើងជាថ្មីម្តងទៀត៕

” alt=”” />

អត្ថបទ៖ ឌី

ប្រភព៖ CNN