ជនរងគ្រោះក្នុងរបបដឹកនាំកូរ៉េខាងជើងម្នាក់បានឲ្យដឹងថា គាត់ធ្លាប់ញ៉ាំកម្អួតនៅតាមដងផ្លូវ ដើម្បីបំពេញសេចក្តីស្រែកឃ្លាន

កូរ៉េខាងជើង៖ អ្នកដែលបានរត់គេចខ្លួនចេញពីប្រទេសកូរ៉េខាងជើង សុទ្ធតែបាននិយាយរៀបរាប់ពីជីវិតដ៏លំបាកវេទនារបស់ពួកគេក្នុងរូបភាពផ្សេងៗគ្នា ព្រោះថាពួកគេបានឆ្លងកាត់ស្ថានភាពលំបាកផ្សេងៗគ្នាដែរ។ តួយ៉ាងបុរសម្នាក់ដែលមានឈ្មោះ Charles Woo Ryu បានរៀបរាប់ថាគាត់ធ្លាប់ញ៉ាំកម្អួតដែលគេបានក្អួតចោលទៀតផង ដើម្បីបំពេញសេចក្តីស្រែកឃ្លានរបស់ខ្លួន។ គាត់បានរៀបរាប់ថា ពេលនោះគាត់នៅមានអាយុ១៤ឆ្នាំ ហើយត្រូវបានគេបង្ខំឲ្យធ្វើការលើសកម្លាំងរាល់ថ្ងៃ និងគ្មានអាហារសម្រាប់ញ៉ាំគ្រប់គ្រាន់ទេ។

គាត់ត្រូវធ្វើការយ៉ាងលំបាកតែម្នាក់ឯងដោយមិនបានជួបអ្នកណាម្នាក់ឡើយប្រហែលជា១៨ម៉ោងក្នុងមួយថ្ងៃ។ ជាធម្មតាគាត់ត្រូវបានគេផ្តល់ពោតប្រហែលជាមួយក្តាប់ដៃប៉ុណ្ណោះសម្រាប់ទទួលទាន ហើយពោតនោះជាចំណីរបស់សត្វជ្រូក និងសត្វគោប៉ុណ្ណោះ មិនមែនជាចំណីរដែលគេរៀបចំសម្រាប់មនុស្សឡើយ។ គាត់បានរំលឹកថានៅក្នុងថ្ងៃមួយដោយសេចក្តីស្រែកឃ្លានខ្លាំងពេក គាត់បានញ៉ាំកម្អួតដែលគាត់បានឃើញនៅលើផ្លូវ។ កម្អួតនោះ ទំនងជាកម្អួតរបស់ក្រុមឆ្មាំ ដែលពួកគេបានផឹកសា្រស្រវឹង និងក្អួតតាំងពីយប់មកម្លះ លុះព្រឹកឡើងកម្អួតនោះបានស្ងួតហើយនៅសល់តែគ្រាប់បាយក្រៀមៗ ឃើញដូចនោះគាត់បានសម្រេចញ៉ាំកម្អួតនោះតែម្ដង។ បច្ចុប្បន្ន Charles Woo Ryu មានអាយុ ២៤ ឆ្នាំ និងបានទៅរស់នៅក្នុងសហរដ្ឋអាមេរិកហើយ៕

ភក្តី

ប្រភព៖mirror

COMMENTS