ចំនួនអ្នកស្លាប់ ដោយសារគ្រោះរញ្ចួយដីនៅឥណ្ឌូនេស៊ីកើនឡើងដល់ជិត៤០០នាក់ហើយ

ឥណ្ឌូនេស៊ី៖ គ្រោះរញ្ចួយដីនៅកោះ Lombok និងកោះ Bali ប្រទេសឥណ្ឌូនេស៊ី បានស្លាប់មនុស្សសរុបចំនួន៣៨៧នាក់ នេះបើតាមឲ្យដឹងពីអាជ្ញាធរក្នុងតំបន់នាថ្ងៃទី១១នេះ ហើយអាជ្ញាធរបានឲ្យដឹងថា ប្រជាជនរាប់សែននាក់កំពុងតែខ្វះទឹកស្អាត ម្ហូបអាហារ និងឱសថជិតមួយសប្តាហ៍ហើយ។

គ្រោះរញ្ជួយដីកម្រិត ៦,៩ រ៉ិចទ័រកាលពីថ្ងៃអាទិត្យ សប្តាហ៍មុន បានបំផ្លិចបំផ្លាញផ្ទះសំដែង វិហារអ៊ីស្លាម និងអាជីវកម្មរាប់ពាន់នៅទូទាំងកោះ Lombok។ លោក Sutopo Purwo អ្នកនាំពាក្យភ្នាក់ងារគ្រោះមហិន្តរាយឥណ្ឌូនេស៊ី បានឲ្យដឹងថា ចំនួនអ្នកស្លាប់អាចនឹងកើនឡើងបន្ថែមទៀត ដោយសារតែគេសង្ស័យថាមានជនរងគ្រោះជាច្រើននៅកប់ក្រោមគំនបាក់បែក ព្រោះមានជនរងគ្រោះជាច្រើននៅបាត់ខ្លួនរកមិនទាន់ឃើញ។

ចំណែកឯតួលេខចំនួនប្រជាជន ដែលត្រូវចាកចេញពីផ្ទះសំបែង ដោយសារតែគ្រោះមហន្តរាយបានកើនឡើងដល់ ៣៨៧.០០០ នាក់ ហើយក្នុងនោះមានអ្នករងរបួសប្រហែល ១៣.០០០ នាក់៕

អត្ថបទ៖ ដេត
ប្រភព៖ channelnewsasia