ឃាតកប្រើ Drone បំពាក់គ្រាប់បែក ប៉ុនប៉ងលួចធ្វើឃាតប្រធានាធិបតីវេណេហ្ស៊ុអេឡា (មានវីដេអូ)

គិតមកទល់នឹងពេលនេះមានមនុស្ស ៦ នាក់ហើយ ត្រូវបានគេចាប់ខ្លួនក្នុងករណីជាប់ពាក់ព័ន្ធរឿងលួចធ្វើឃាតលោក ប្រធានាធិបតីវេណេហ្ស៊ុអេឡា Nicolás Maduro​ ដែលបានកើតឡើងកាលពីថ្ងៃសៅរ៍កន្លងទៅនេះ។ យ៉ាងណាក្តីជនទាំង ៦ នាក់នោះមិនទាន់ត្រូវបានគេបង្ហាញអត្តសញ្ញាណពិតប្រាកដនៅឡើយទេ ដោយគេចង់រក្សាការសម្ងាត់សិន ដើម្បីងាយស្រួលក្នុងការស៊ើបអង្កេតស្វែងរកមេក្លោងធំដែលនៅពីក្រោយរឿងនេះ។ សូមរម្លឹកឡើងវិញថា លោកប្រធានាធិបតីវេណេហ្ស៊ុអេឡា Nicolás Maduro ត្រូវបានគេលួចធ្វើឃាតដោយប្រើប្រាស់ Drone បង្កប់គ្រាប់បែក ដើម្បីហោះមកទំលាក់លើរូបលោក ខណៈលោក កំពុងតែធ្វើសន្ទរកថាផ្លូវការមួយនៅមុខមនុស្សជាច្រើននាក់។

យ៉ាងណាក្តី គ្រាប់បែបបានផ្ទុះមុនពេល Drone ហោះមកដល់វេទិការ ដែលលោក Nicolás Maduro កំពុងធ្វើសន្ទរកថា និងមិនបានបង្កឲ្យអ្នកណាម្នាក់ស្លាប់នោះទេ។ ក្រោយកើតហេតុប្រមាណជា៣ម៉ោង  ប្រធានាធិបតីវេណេហ្ស៊ុអេឡាបានថ្លែងចោទប្រកាន់ថា ករណីលួចធ្វើឃាតនេះគឺជាការរៀបចំរបស់ប្រធានាធិបតីកូឡុំប៊ីគឺលោក Juan Manuel Santos មកកាន់រូបលោក។ យ៉ាងណាក្តី រដ្ឋាភិបាលកូឡុំប៊ី តាមរយៈក្រសួងការបរទេសរបស់ខ្លួនបានច្រានចោលការចោទប្រកាន់នេះទាំងស្រុង និងបាននិយាយថា ការចោទប្រកាន់នេះគ្មានភស្តុងតាំងច្បាស់លាស់ និងជាការចោទប្រកាន់ដោយងងឹតងងុលបំផុត។ តាមអ្នកវិភាគបានលើកឡើងថា ករណីនេះអាច ការរៀបចំឡើងពីសំណាក់ក្រុមប្រជាជនដែលមិនគាំទ្ររបបដឹកនាំបែបផ្ដាច់ការ និងកុំមុយនីយនិយមរបស់លោក ប្រធានាធិបតីវេណេហ្ស៊ុអេឡា៕

អត្ថបទ៖ ភក្តី

ប្រភព៖ bbc